CHƯƠNG TRÌNH THỜ PHƯỢNG DÀNH CHO BAN THANH NIÊN. CHÚA NHẬT 23.03.2025
By Mai hdenayun in H'MÔNG on 18 Tháng Ba, 2025
Hnub kaj 23.03.2025
- Ntsiab lus: TXOJKEV HLUB SIB RAUG ZOO.
- Vajluskub: Chivkeeb 3:9; 2Kevcai 6:4-5; Efexaus 2:10.
- Nqe cim: “Ib tsoom Yixalayees, nej ua tib zoo mloog, tsuas yog tus Tswv tib leeg xwb, thiaj yog peb tus Vajtswv. Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog” (2Kevcai 6:4-5).
- Twv Vajluskub: Salumoos Tej Nkauj 1-4.
- Tus qauv: Coj kawm Vajluskub.
* TAW QHIA: Saib hnub kaj 26.01.2025.
Lus nug taw qhia: Nyeem Filipis 3:4-14; Xaiv ib feem hauv cov feem lus nug hauv qab no:
(1.1) Lus lug soj: Yav dhau los, Paulus yog ib tus neeg zoo li cas?
(1.2) Lus nug xav: Vim li cas Paulus saib qeg nws lub neej yav tag dhau los?
(1.3) Lus nug siv: Yav dhau los, puas muaj yam twg tau cuam tshuam tsis zoo rau koj lub neej niaj hnub no? Koj xav koj tau npaj los feem ntau yog yav dhau los lossis yav tom ntej ntawm koj? Vim li cas?
(2.1) Paulus tau nqhis nqhawv yam dabtsis suav txij thaum yawg lees paub tias tus Tswv tseem ceeb tshaj hauv yus lub neej?
(2.2) Raws li koj, yuav ua cas thiaj li paub tus Tswv, nyob hauv tus Tswv thiab zoo li Nws?
(2.3) Yam koj ntshaw tshaj hauv lub neej yog dabtsis? Koj ua dabtsis los txhawm rau koj txojkev ntshaw ntawd?
(3.1) Paulus ua dabtsis los npaj rau nws txojkev tau txais khoomplig yav tom ntej no?
(3.2) Txojkev sib tw txog kev nqua hu saum ntuj muaj lub ntsiab li cas?
(3.3) Koj tabtom nqeg peev lub neej, sijhawm thiab tej uas koj muaj rau qhov twg?
* NTAUB NTAWV PAB.
I. TAU TSIM LOS RAU TXOJKEV HLUB SIB RAUG ZOO.
Yog xav hais luv tag nrho phau Vajluskub Qub, ces nqe hais luv ntawd yuav tau piav qhia dhau nqe Vajluskub no: “Ib tsoom Yixalayees, nej ua tib zoo mloog, tsuas yog tus Tswv tib leeg xwb, thiaj yog peb tus Vajtswv. Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog” (2Kevcai 6:4-5).
Vajtswv nqe lus nqua hu no tau piav qhia tshab plaws Vajluskub Qub. Moj yam ntawm Phau Vajluskub Tshiab kuj zoo ib yam nkaus li ntawd. Tswv Yexus tau rho nqe Vajluskub no hauv 2Kevcai los hais tawm nqe kevcai uas tseem ceeb tshaj hauv cov nqe kevcai: “Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog” (Mal 12:30). Txhua yam hauv koj lub neej ntseeg Yexus, txog kev paub thiab muajxwm txog Vajtswv tus dej siab, puav leej yog nyob txij ntawm koj txojkev hlub kev sib raug zoo nrog tus Tswv. Yog koj txojkev hlub sib raug zoo ntawd tsis ruaj, txhua yam hauv koj lub neej puav leej tsis ruaj.
II. TAU TSIM LOS RAU TIAM IB TXHIS.
Vajtswv tsis tsim koj los rau lub sijhawm; nws tsim koj los rau lub neej ib txhis.
Paulus yog ib tus neeg Yudas tseem tseem thiab yog xeem Npeeyamees. Yawg coj raws nraim li cov Falixais txojkev cai uas yeej tsis muaj ib qhov yuav thuam tau li. Yawg yog ib tus uas kub siab ua Vajtswv haujlwm. Yawg ntsia tej ntawd zoo ib yam li tej quav nyab thiab kev poob peev. Paulus xav paub Tus Khetod thiab tau nyob hauv Nws kom tau lub neej kaj siab rau yav tom ntej (hauv ntuj ceeb tsheej). Yawg tsis nco qab lub neej qub tiamsis ntsia ntsoov rau lub neej tom ntej. Paulus ntsia ntsoov lub homphiaj tom ntej uas yog tau txais txojkev muaj yeej saum ntuj ceeb tsheej (Filipis 3:4-14).
Paulus txojkev ntshaw tiag tiag ces yog paub tus Khetod thiab dhau los zoo ib yam li Nws. Koj kuj muaj cuab kav muab koj lubneej tso rau Vajtswv ua tus coj kom los paub Nws, hlub Nws ib leeg thiab dhau los zoo ib yam li Nws. Cia koj lub neej nimno raug muab zuaj thiab npaj rau tej uas koj yuav tau muaj nyob hauv Yexus Khetod. Koj tau tsim los rau lub neej ib txhis! Koj yuav tau pib npaj koj lub neej rau Vajtswv tej homphiaj. Vajtswv lub homphiaj hla dhau lub sijhawm mus rau tiam ib txhis. Cia li tabpov tias koj tabtom nqeg peev koj lub neej, sijhawm thiab txhua yam uas koj muaj mus rau tej uas yuav mus ib txhis, tsis yog rau tej uas yuav dhau mus. Yog tsis pom tias Vajtswv tau tsim koj los rau tiam ib txhis, ces tej zaum koj tabtom nqeg peev yuam kev lawm. Koj yuav tsum khaws txhua yam cia rau saum ntuj ceeb tsheej (Mathais 6:19-21, 33). Ntawm no yog vim chij vim li cas txojkev hlub sib raug zoo nrog Vajtswv ho tseem ceeb npaum li ntawd. Tus Tswv hlub koj, Nws paub yam uas zoo tshaj rau koj. Tsuas muaj Vajtswv xwb thiaj coj tau koj txoj hau kev los nqeg peev rau yam muaj nuj nqis rau koj lub neej. Txojkev coj no yuav los thaum koj mus raws li Vajtswv coj thiab ua zoo mloog Nws lub suab.
LUS NUG XAV THIAB SIV
- Vim li cas peb yuav tsum “khaws txhua yam cia rau saum ntuj ceeb tsheej”?
2. Koj tau txais yam dabtsis hauv txojkev hlub sib raug zoo nrog Vajtswv?