CHƯƠNG TRÌNH THỜ PHƯỢNG DÀNH CHO BAN PHỤ NỮ. CHÚA NHẬT 02.03.2025
By Mai hdenayun in H'MÔNG on 3 Tháng Ba, 2025
Hnub kaj 02.03.2025.
- Ntsiab lus: YAUNAS – TUS UAS QHIA TSHWM VAJTSWV TXOJKEV HLUB COV NEEG TXHAUM.
- Vajluskub: Yaunas 1-4; 2Petus 3:9-10.
- Nqe cim: “Vajtswv ua siab ntev rau nej, rau qhov nws tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg.” (2Petus 3:9b).
- Twv Vajluskub: Yelemis 22-24.
- Tus qauv: Nug teb.
* TAW QHIA: Nug teb.
- Xaiv ib tus los ua Yaunas thiab ib tus los ua tus nug.
- Tshawb nrhiav qhov Vajluskub thiab feem ntawv pab pwv los npaj ntau lolus nug rau ob tug kawm kom nco. Txhua lolus nug yuavtsum luv, tiamsis muaj txaus ntsiab lus, thiab yuavtsum ua rau sawvdaws muaj luag, kom lawv thiaj yoojyim nco tau tej ua kawm rau hnub ntawd.
- Caw ib tus ua ntej sawv cev los mus xaus zaj nug teb thiab qhia tshwm tej ntsiab lus uas kawm tau hauv zaj xwm. Thov Vajtswv xaus zaj kawm (Caw tus uas teb ntawd thov Vajtswv los tau).
* PAB PWV RAU KEV NUG TEB.
Tom qab uas tus coj qhia tshwm tus qauv pehawm lawd, tus nug yuav tuaj nram qab tuaj, thiab Yaunas los sab nrau los.
– TN: Nyob zoo os yawg Yaunas!
– Yaunas: Nyob zoo os cov namtsev txhua tus.
– TN: Peb zoo siab heev rau qhov koj ua yawg tuaj koom peb hnub no. Sawv cev ntawm pab niamtsev kuv muaj lus zoo siab txais tos koj ua yawg. Lub sijhawm sib ntsib hnub no, thov koj qhia me ntsis txog kev qhia txoj hmoo zoo rau lwm haivneeg rau peb puas tau?
– Yaunas: Ua li, kuv kuj npaj siab tau lawm, nej yeej meem nug!
– Tn: Ua ntej thov koj qhia koj chaw nyob, thiab lub sijhawm uas Vajtswv hu koj los cevlus rau peb yom?
– Yaunas: Kuv yog Amitais tus tub, nyob hauv lub nroog Nkathas Hefeles, tsis deb ntawm Naxales yav qaumteb. Lub sijhawm kuv pib cevlus yog xyoo 780-750 UY uas nyob rau tiam Yelaunpau-as 2 ua vajntxwv.
– Tn: Lub sijhawm ntawd, Ninives (Axilias) yog cov Yixalayees tus yeebncuab, vim li cas Vajtswv ho txib koj mus cevlus kom lawv tso kev txhaum tseg os yawg?
– Yaunas: Vim li ntawd ntag, kuv thiaj tsis kam mus, kuv txawm ua li kuv xav tsis mloog Vajtswv lus mus rau Ninives, kuv thiaj mus rau Xapees ntag.
– Tn: Vajtswv puas txaus siab rau qhov uas koj ua li koj lub siab xav ntawd?
– Yaunas: Yeej tsis tau li, Vajtswv tav kuv kev tsis pub kuv mus, Nws ua kom kuv kawg mloog Nws lus xwb thiaj tas.
– Tn: Yawg, koj qhia kom peb paub meej dua qhov no puas tau?
– Yaunas: Thaum nkoj tab tom hla hiavtxwv mus rau sab Xapees. Lub sijhawm ntawd kuv tseem tsaug zog, nag xob nag cua los hlob heev, hiavtxwv ntas loj kawg ua rau lub nkoj yuav luag tog rau hauv hiavtxwv. Ua rau sawvdaws ntshai kawg nkaus li! Kuv paub tias Vajtswv tab tom tav kuv kev, kuv thiaj leeg kev txhaum thiab cia lawv muab kuv pov rau hauv hiavtxwv kom lawv sawvdaws thiaj tsis raug puastsuaj vim kuv.
– Tn: Koj yog ib tus neeg uas muaj siab tawv, txaus siab tuag kom lwm tus tau txais kev cawmdim. Lub sijhawm ntawd koj xav li cas xwb os yawg?
– Yaunas: Kuv xav hais tias kuv xum tuag hauv hiavtxwv ntshai yuav zoo dua li qhov uas mus qhia rau ib haivneeg phem li ntawd. Ib chim yog lawv leeg kev txhaum ces Vajtswv yuav tshua txog lawv thiab lawv yuav tsis raug puastsuaj.
– Tn: Kuv nyiam qhov uas koj hlub tshua txog koj lub tebchaws ntawd. Es ua li thaum uas koj raug pov rau hauv hiavtxwv nev, ho muaj yam dabtsi tshwmsim rau koj os yawg?
– Yaunas: Tus Tswv npaj ib tus ntses loj heev los nqog kuv. Thaum nyob rau hauv ntses plab, kuv thov Vajtswv cawm kuv, Nws thiaj teb kuv tej lus thov. Tom qab 3 hnub 3 hmos Vajtswv thiaj ua kom ntses ntuav kuv tawm los rau tim ntug hiavtxwv.
– Tn: Nws yog ib qhov uas txawv kawg nkaus rau qhov koj tseem muaj sia tom qab 3 hnub 3 hmos hauv ntses plab thiab. Ua li es tom qab ntawd koj mus qhov twg os?
– Yaunas: Kuv tsis kav tawm tsam tus Tswv tej lus lawm, kuv thiaj li mus raws rau Ninives cevlus rau lawv li uas tus Tswv tau kom kuv ua.
– Tn: Tom qab uas koj qhia lawv tas nev ho muaj dabtsi tshwmsim os yawg?
– Yaunas: Txij ntua vajntxwv los mus rau pejxeem huvsi, txhua tus puavleej leeg thiab tso kev txhaum tseg. Vim qhov lawv tso kev txhaum tseg ntawd, tus Tswv thiaj tsis ua kom lawv puastsuaj li tej lus uas Nws twb hais lawd.
– Tn: Yog tus uas mus qhia, tsimnyog koj yuav zoo siab thaum uas pom tej ntawd tshwmsim, tiamsis zoo li kuv pom mas koj tsis txaus siab thaum uas koj pom lawv ua li tej lus uas koj hais lawm puas yog os yawg?
– Yaunas: Kuv mus rau Ninives vim yog kuv fwm tus Tswv thiab mloog Nws lus xwb, tsis yog kuv hlub tshua lub nroog Ninives. Txawm kuv mus qhia lawv los kuv yeej xav kom lawv rau tus Tswv ua kom puas tsuaj lawv thiaj tsis tuaj txeeb peb lub tebchaws Yixalayees ntxiv, thaum pom tias tus Tswv tsis rau txim rau lawv, kuv thiaj chim thiab kuv xav tuag kiag li lawm xwb.
– Tn: Tom qab ntawd Vajtswv ho ua li cas qhia koj ntxiv?
– Yaunas: Kuv ua ib lub chaw zaum rau sab nrau ntug nroog tos saib puas muaj dabtsi tshwm sim rau nroog Ninives. Tus Tswv thiaj npaj ib tsob ntoo hmab luas los rau saum kuv lub chaw nkaum ntxoo, ua rau kuv muaj kev kajsiab heev. Tiamsis hnub qab, tus Tswv txawm rov txib ib tus kab los txiav tsob hmab ntawd tu, thaum hnub tuaj ziab nws ntsws thiab tuag mus lawm. tshav rov kub kuv heev, kuv thiaj rov yws rau Vajtswv dua, tus Tswv qhia kuv ib zaj kawm uas tseemceeb heev, kuv tsis muaj hnub uas yuav hnov qab li.
– Tn: Zaj kawm ntawd zoo li cas, thov koj qhia rau peb tau paub puas tau os yawg?
– Yaunas: Nim no yog rov hais txog, kuv pom tias kuv txajmuag rau kuv tug kheej heev: Kuv nplooj siab hlub teb hlub chaws es kuv npau taws, kuv txojkev chim thaum tus kab txiav tsob hmab uas ua ntxoo kuv nraim tshav tu ntawd Vajtswv qhia rau kuv paub tias kuv yog ib tus neeg cuam khaum, siab nqaim kawg nkaus li!
– Tn: Koj puas kam qhia kom peb totaub meej txog kev cuam khaum thiab siab nqaim yog li cas tiag os yawg?
– Yaunas: Kuv khuvxim ib tso hmab tiamsis tsis hlub tshua txog tsheej txheeb tus ntsujplig uas nyob hauv Ninives tab tom yuav raug puas tsuaj, tiamsis Vajtswv hlub lawv heev. Kuv nploojsiab hlub teb hlub chaw yeej zoo los mav, tiamsis nploojsiab hlub teb hlub chaw ntawd yuav tsum yog tso mus raws li Vajtswv txoj hauvkev thiaj li yuav muaj nqis.
– Tn: Yog ib tus cevlus rau Vajtswv, tiamsis zoo li thaum ntawd koj tsis totaub txog Vajtswv dej siab thiab tsis tau mloog Nws lus ib puas feem pua yom?
– Yaunas: Yog maj, vim lub sijhawm ntawd kuv tsis pom txog Vajtswv txoj kev cawmdim uas yuav cawm txhua txhia haivneeg huvsi, thiab Nws txojkev hlub rau txhua txhia tus nrog rau Nws txojkev txiav txim uas twb npaj tseg rau ib hnub tom ntej lawm. Tej uas kuv xav thiab kuv ua yeej pab tsis tau haivneeg Yixalayees dim ntawm haivneeg Axilias li.
– Tn: Yawg, ua koj tsaug uas koj tau qhia rau peb paub txog kev xa hmoo zoo mus rau haivneeg Ninives. Tus uas ua Vajtswv haujlwm yuav tsum tso nploojsiab cuam khaum ntawm yus tug kheej tseg, yuav tsum mus raws li txej uas tus Tswv xav kom yus ua thiab mloog Nws lus.
– Tus coj: Ib tsoom vivncaug sawvdaws! Peb twb tau mloog yawg Yaunas qhia txog nws lub neej uas cevlus mus rau haivneeg uas nyob hauv nroog Ninives lawm. Thov Vajtswv pab kom peb sawvdaws nco tau yam no: “Vajtswv ua siab ntev rau nej, rau qhov nws tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg.” (2Petus 3:9).
Dhau los ntawm Yaunas lubneej peb kawm tau yam tseemceeb no: Yuav mloog tau Vajtswv lus ces peb yuav tsum tso tej uas peb xav ntawm peb tug kheej tseg.
Caw sawvdaws sawv ntsug es thov caw yawg Yaunas ho thov Vajtswv pab rau peb cov niamtsev.
II.LUS NUG XAV THIAB SIV.
- Dhau los ntawm tej xwmtxheej nram qab no, thov qhia tshwm Vajtswv txoj koob hmoov pub rau tus neeg txhaum:
- Yaunas tus kheej: Vajtswv ho ua li cas rau nws thaum:
(1) Yaunas khiav tsis mloog Vajtswv lus (1:3-7).
(2) Yaunas raug pov rau hauv hiavtxwv (2:1).
(3) Yaunas nyob hauv ntses plab (2:3-11).
(4) Yaunas thov kom nws tuag (4:6).
- Haivneeg hauv Ninives: Vajtswv ho ua li cas? (1:1; 3:4; 3:10).
- Dhau los ntawm tej teebmeem tshwmsim rau Yaunas, nws kawm paub txog Vajtswv yog tus zoo li cas thiab nws kawm tau dabtsi? (2:1-11,4,1-2,9-11).
- Zajxwm Yaunas nyob hauv ntses plab thiab tau cawm tawm rov los mus qhia rau cov neeg Ninives muaj ntsiab lus dabtsi los ntawm sab ntsujplig thiab sab cevlus? (2:1-3; Lu 11:29-32; Mat 12:39-41; Daniyees 12:1-3).
- a. Thov tshawb txog 4 yam vimchij nram qab no:
(1) Vim li cas Yaunas ho khiav nraim Vajtswv? (1:3).
(2) Vim li cas Yaunas ho xav kom lawv muab nws pov rau hauv hiavtxwv? (1:11-12).
(3) Vim li cas Yaunas ho npau taws? (4:1).
(4) Vim li cas Yaunas ho thov tias cia nws tuag? (4:2-3).
- Dhau los ntawm tej vimchij ntawd, thov ntaus nqi.
(1) Yaunas tus yamntxwv.
(2) Yam dabtsi ua rau Yaunas tsis ua raws li Vajtswv tej lus? Yam ntawd qhia rau peb txog yam dabtsi?
- Yaunas tes haujlwm, peb kawm tau dabtsi txog Vajtswv txoj koob hmoov, Nws txojkev cawm dim, thiab Nws tes haujlwm rau peb niaj hnub nim no? (Malakaus 16:15; Yauhas 3:16-21,36; 2 Petus 3:9-10).
- a. Koj tab tom khiav nraim lossis mloog Vajtswv tej lus uas txib koj?
- Muaj yam dabtsi cuam tshuam ua rau koj tsis kam coj txojkev cawmdim mus qhia rau lwm tus?
- Koj coj tus cwjpwm li cas thaum ib tus neeg txhaum tig los txais yuav tus Tswv Yexus?
* HIỂU BIẾT THƯỜNG THỨC.
– Tẩy Vết Máu.
Trước hết không được dùng nước nóng vì sẽ làm cho máu đông lại, khó tẩy sạch. Dùng nước lạnh xả lên máu. Sau đó, dùng nước tiểu hoặc nước đu đủ (dùng 3-5 lá đun lấy nước) để tẩy vết máu. Hiện nay, có một số bột giặt có chứa enzim có khả năng tẩy vết máu. Nếu đồ len bị vết máu thì ngâm trong nước ấm có chứa một viên aspirine, sau đó dùng quạt hong khô.