CHƯƠNG TRÌNH THỜ PHƯỢNG DÀNH CHO BAN PHỤ NỮ. CHÚA NHẬT 12.01.2025

By Mai hdenayun in H'MÔNG on 24 Tháng Một, 2025

Hnub kaj 12.01.2025.

1. Ntsiab lus: DANIYEES – TUS QHIA TSHWM VAJTSWV YOG TUS TSWJHWM IB PUAS TSAVYAM.
2. Vajluskub: Daniyees 2:26-49; 4:20-37; 5:26; 6:25-27.
3. Nqe cim: “Vajtswv yog tus txawj ntse thiab muaj hwjchim loj! Cia li qhuas nws mus ibtxhis” (Daniyees 2:20).
4. Twv Vajluskub: Yelemis 4-6.
5. Tus qauv: Qhuab qhia.

* TAW QHIA: Qhuab qhia.

1. Caw xibhwb lossis thawjcoj los npaj zaj qhuab qhia ua ntej li 2 Athiv.
2. Sau ntsiab lus, feem Vajluskub ua chaw txawb, nqe cim thiab tej feem Vajluskub pab pwv cob rau tus qhuab qhia kom nws thiaj li npaj tau raws li cov niamtsev lub hom phiaj. Cheemtsum ces muab phau ntawv no rau nws saib feem ntawv pab pwv los tau.

* NTAWV PAB PWV.

1. QHIA TSHWM.

Nyob rau xyoo 604 UY. xyoo thib 3 uas Yehauyakees ua vajntxwv kav Yudas. Vajntxwv Nenpukanexales coj tubrog tuaj vij lub nroog Yeluxalees thiab ntes ntau leej mus ua cev qhev. Daniyees yog xeem Yudas. Nyob rau tebchaws Npanpiloos Daniyees raug tis dua lub npe tshiab hu ua Npeetesaxas. Tom qab kawm txhua yam hauv nroog Npanpiloos tas Daniyees tau mus ntsib vajntxwv. Dhau los ntawm kev hais lus, vajntxwv xav tsis thoob li, rau qhov Daniyees yog ib tus uas ntse tshaj 10 tus txiv neeb txiv yaig hauv Npanpiloos.

Daniyees yog ib tus neeg tseemceeb rau txhua tiam vajntxwv Npanpiloos. Dhau los ntawm qhov uas txhais zaj npau suav txog tus mlom, vajntxwv thiaj tsa Daniyees ua tus saib tagnrho tej tub txawj tub ntse thiab tsa nws ua tus kav tagnrho 3 lub nroog hauv Npanpiloos. Dhau los ntawm kev txhais cov npe ntawv uas sau rau ntawm phab ntsa, vajntxwv tsa Daniyees ua tus nom loj thib 3 ntawm tebchaws.

Daniyees yog tus uas pom kev vammeej thiab kev puas ntsoog ntawm txhua tiam vajntxwv hauv Npanpiloos. Tej lus uas Daniyees tau cevlus tshwjxeeb yog hais txog tus Tswv Yexus, thaum Nws hais rau cov thwjtim saum roob txiv ntoo roj txog qhov uas lub ntiajteb no yuav kawg, kev txhim tsa rov  muaj tebchaws Yixalayees, thiab qhov uas tus Tswv Yexus rov qab los zaum ob (Daniyees 2:31-45; 9:24-27; Malakaus 13; Mathais 24:15;).

Dhau los ntawm Daniyees lub neej, peb yuav ua cas thiaj qhia tshwm txog Vajtswv lub hwjchim loj dua ntais uas Nws tswjhwm lub ntiajteb no?

1. XAV.
2. DANIYEES TES HAUJLWM.
3. Daniyees txhais zaj npau suav.

(1) Txhua yam nraim nkoog puavleej yog Vajtswv li (2:17-20).

(2) Vajtswv yog hauv paug ntawm kev txawj ntse (Pajlug 1:7, 2Kauleethaus 3:5).

(3) Zaj npau suav uas Daniyees txhais tsis yog tej kev xav li peb tibneeg xav.

– Vajntxwv Nenpukanexales txog kev khav theeb.

– Txhais ntawm tsob ntoo loj, Daniyees qhia tshwm rau vajntxwv tias Vajtswv yog tus uas loj dua ntais, Nws tsa tus neeg txo hwjchim, thiab txo tus uas khav theeb (4:34-35).

– Ntawm vajntxwv Npesaxas tus uas ua vajntxwv txuas ntxiv Nenpukanexales: Daniyees raug caw mus txhais tas ua rau vajntxwv paub tias Vajtswv yog tus tuav vajntxwv txoj pa, thiab txhua txoj hauv kev ntawm vajntxwv lub neej. Nws twb suav vajntxwv lub tebchaws thiab yuav ua mus kom txog thaum kawg, qhov ntawd yog lub ntsiab lus ntawm cov npe ntawv: MENES, MENES, TEKELES, PALEXEES (5:22-30).

– Ntawm vajntxwv Dali-us: Vajtswv txib timtswv los kaw tsov ntxhuav lub qhov ncauj, tsis pub tsov ua li cas rau Daniyees. Qhov timkhawv no ua rau  vajntxwv fwm Vajtswv, vajntxwv thiaj nqua hu kom tej pejxeem sawvdaws cia li qhuas Vajtswv (6:26-27).

2. Daniyees raug kev tsim txom.

Los ntawm qhov uas nws muaj meej mom siab, ua rau nws tej yeebncuab ntxub nws. Lawv kom vajntxwv sam hwm kom 30 hnub tsis pub leejtwg pehawm, lossis thov lwm tus vajtswv, tsuas yog vajntxwv tibleeg nkaus xwb. Yog leejtwg tsis ua raws yuav raug pov rau hauv qhov tsov ntxhuav. Daniyees yeej tsis quav ntsej, nws yeej tseem ib hnub txhog caug thov Vajtswv 3 zaug li nws ibtxwm (6:10).

(1) Daniyees cia siab rau Vajtswv: Nws yeej thov Vajtswv tabmeeg.

(2) Daniyees ncaj ncees rau Vajtswv: Thov Vajtswv tsis tseg.

3. Daniyees tes haujlwm cevlus.

Daniyees paub txog ntau yam uas Vajtswv yog tus qhia rau nws txog thaum ntiajteb kawg (7-12). Daniyees paub txog ntau yam tshwmsim txij ntua vajntxwv Nenpukanexales tiam mus txog thaum Yexus Khetos rov qab los. Lub ntiajteb yuav muaj 4 lub tebchaws loj sib hloov tswjhwm, ib feem ntawm tus mlom yog pivtxog ib lub tebchaws ntag.

1. DANIYEES UA LUB NEEJ HWM TUS TSWV.

Daniyees thiab Yauxes muaj ntau yam sib xws. Nkawd puav leej raug coj mus rau hauv ib lub tebchaws uas tsis muaj kev pehawm Vajtswv, nkawd puavleej tau tej koobmoov uas txhais npau suav, nkawd puavleej tseem hluas tiamsis muaj lub neej uas hwm tus Tswv. Daniyees tau qhia tshwm vajntxwv paub txog Vajtswv lub hwjchim uas loj thiab qhov uas Vajtswv yuav los cawm.

III. LUS NUG XAV THIAB SIV.

1. a. Daniyees muaj kev txawj ntse tshwjxeeb rau yam twg? Yog muab nws piv rau cov tub txawj tub ntse hauv Npanpiloos nev zoo li cas xwb? (Daniyees 1:17-20; 4:9; 4:18; 5:11-12).
2. Daniyees qhia tshwm Vajtswv lub hwjchim li cas rau vajntxwv paub? Lawv muaj kev xav li cas txog Vajtswv?
3. a. Dhau los ntawm txhua tiam vajntxwv Npanpiloos, Daniyees tau txais tej meej mom li cas? Nyob rau thaum nws raug kev tsim txom yog nws tuav lub meej mom twg? (Da 2:48-49; 6:29; 6:1-4).
4. Daniyees ua li cas thaum nws cov yeebncuab tsim txom nws? Thaum kawg zoo li cas xwb? (Da 6:10-28).
5. Thov qhia tshwm tej yam uas hais txog Daniyees lub neej uas hwm Vajtswv (1:8; 2:1; 2:20-21; 26-28; 49; 6:10-13; 21-22).
6. Daniyees lub neej uas ua haujlwm, thiab nws tej kev raug tsim txom muaj ntsiab lus li cas rau peb lub neej uas ntseeg niaj hnub nim no?
7. Koj yuav ncaj ncees qhia txog Vajtswv lub hwjchim li cas rau tus uas tawm tsam thiab ua saib tsis taus Vajtswv?

* HIỂU BIẾT THƯỜNG THỨC.

Cách Chống Say Sóng: Lấy gừng tươi cùng với gừng khô, tán nhuyễn uống vào là khỏi.