CHƯƠNG TRÌNH THỜ PHƯỢNG DÀNH CHO BAN PHỤ NỮ. CHÚA NHẬT 16.03.2025

By Mai hdenayun in H'MÔNG on 11 Tháng Ba, 2025

Hnub kaj 16.03.2025.

1. Ntsiab lus: MIKHAS – TUS CEVLUS TXOG TUS VAJNTXWV THAJYEEB YUAV LOS.
2. Vajluskub: Mikhas 4:1-5; 7:7-20.
3. Nqe cim: “Thaum nws los, tus TSWV uas yog Vajtswv yuav pub tus TSWV lub dag lub zog thiab lub hwjchim rau nws kav nws haivneeg.” (Mikhas 5:4a).
4. Twv Vajluskub: Yelemis 28-30.
5. Tus qauv: Tshawb nrhiav

* TAW QHIA: Tshawb nrhiav.

Caw ib tus thawjcoj, lossis xibhwb uas muaj kev totaub txog sab ntsujplig los Tshawb nrhiav txog lub ntsiab lus “MIKHAS – TUS CEVLUS TXOG TUS VAJNTXWV THAJYEEB YUAV LOS” thiab coj los qhia rau cov niamtsev.

I. QHIA TSHWM.

Lub npe Mikhas txhais tias “Zoo li tus TSWV”. Mikhas nyob rau tiam uas Yaxayas. Nyob rau lub zos Mauleses, ib lub nroog me sab qab teb ntawm Yeluxalees. Vajtswv hu nws los ua tus cevlus rau xyoo 740-690 UY

Nyob rau tiam Mikhas, lub tebchaws Axilias yog lub uas txaus ntshai rau tebchaws Yixalayees. Mikhas coj Vajtswv Txojlus los ceeb toom rau haivneeg Yixalayees, tshwjxeeb yog hais txog kev ncaj ncees ntawm kev ua neej. Tej uas Mikhas cevlus muaj ob yam tseemceeb: (1) Hais txog kev puas tsuaj ntawm tebchaws Yixalayees thiab kev ua cev qhev ntawm tebchaws Yudas. (2) Hais txog tus Mexiyas lub tebchaws yuav los. Tiamsis qhov tshwjxeeb dua ntais ntawm Mikhas tej lus yog hais txog tus Mexiyas los tshwm ob zaug, Nws yog tus Cawmseej thiab yog Vajntxwv ntawm txhua tus vajntxwv.

II. ZAJ KAWM.

1. Mikhas tej lus ceeb toom thiab cov Yixalayees tej kev txhaum.

Nyob rau tiam ntawd, haivneeg Yixalayees ua txhaum loj kawg nkaus li, tshwjxeeb yog cov nomtswv thiab cov saib xyuas kev pehawm. Lawv tej kev ua txhaum muaj li nram qab no:

(1) Ntshaw luag tug: Txog qib uas mus huab pejxeem teej tug huv tibsi li (2:2,9). Lawv hla nqe 10 ntawm Vajtswv 10 nqe kevcai (Khiavdim 20:17).

(2) Yuam tej pejxeem ua qhev kawg zog li (3:2-3).

(3) Noj nyiaj xiab (3:11). Vajtswv yeej twb ceeb toom rau lawv lawm (3:9-10).

(4) Saib tsis taus tej neeg pluag thiab ua neeg dag (6:12).

Dhau los ntawm tej uas peb soj tas los no, peb pom txog tias lub sijhawm ntawd lawv lub tebchaws yog ib lub uas puv npo kev phem kev qias, tsis muaj ib txojkev ncaj ncees li, niaj hnub yuam tej pejxeem dag zog noj. Yog ib lub tebchaws uas tsimtxom tej pejxeem los ntawm lub meej mom uas lawv tau, hla Vajtswv txojkev ncaj ncees! Vim li ntawd Mikhas cevlus txog kev txiav txim yuav los. Lawv yuav raug Vajtswv rau txim rau lawv, yuav raug foom thiab lub tebchaws yuav tsis muaj neeg nyob: (6:13). Lolus no qhia rau peb paub tias tus uas saib tsis tau Vajtswv txojkev ncaj ncees yuav tau txais tej uas quaj ntsuag los rau yus tug kheej. Qhov no ceeb toom kom peb paub ua peb lub neej txhua hnub kom ncav cuag tej uas Vajtswv xav tau (6:8).

2. Cev lus txog tus Mexiyas.

Hais txog tus Mexiyas, Mikhas hais muaj ob zaug uas Nws los (4,5):

(a) Los zaum ib. Hauv (5:1-2) Mikhas hais txog thaj chaw uas Nws yug: Npelehees (Mat 2:1-6); Nws coj lub npe tias Tus Tswv Yug haivneeg Yixalayees (Yauhas 10:11); Nws yog tus uas yeej ib txwm muaj nyob lawm (Yauhas 1:1); Nws yug los ntawm Daviv cajceg (Mat 1:18-23). Txhua lolus no yeej muaj tiav raws nraim li qhov uas tus Tswv Yexus los yug ua ntej no 2000 xyoo los lawm.

(b) Los zaum ob: Tus Mexiyas los zaum ib yog los ua tiav txojkev cawmdim. Tiamsis zaum ob no Nws los yog los ua Vajntxwv coj kev thajyeeb los rau haivneeg Yixalayees thiab lub ntiajteb no (5:3-4). Hauv tus Mexiyas lub tebchaws uas Nws kav muaj ob yam:

(1) Kev thajyeeb: (4:3).

(2) Kev ncaj ncees: (4:2).

Ob yam ntawd puav leej yog ob yam uas txhua lub tebchaws puavleej ntshaw thiab xav tau ntag.

3. Kev ntseeg thiab tes haujlwm.

Txawm paub tias tus Tswv yuav rau txim rau haivneeg Yixalayees, lawv yuav raug nplawm mus rau txhua lub tebchaws, tiamsis dhau los ntawm cov lus cev uas hais txog tus Mexiyas yuav los no, Mikhas totaub txog Vajtswv txojkev cawmdim rau haivneeg Yixalayees kuj ib yam li kev txiav txim ncaj nceeg rau txhua lub tebchaws huvsi. Mikhas tso siab plhuav rau Vajtswv vim Nws totaub tias:

(1) Nws yog tus Cawmseej: (7:7-8).

(2) Nws yog tus uas muaj kev hlub: (7:18-20).

Los ntawm txoj kev cia siab no, Mikhas thiaj coj tej lus uas nplig haivneeg Yixalayees siab vim tus Tswv yuav cawm lawv tom qab uas Nws nplawm lawv. Nws nqua hu kom lawv cia li thov tus Tswv es thiaj tau txais tus Tswv txojkev zam txim.

Dhau los ntawm Mikhas txojkev cia siab, peb kawm tau 3 yam:

– Vajtswv yog lub chaw rau peb txojkev ntseeg.

– Txawm muaj kev ntseeg los kuj cheem tsum kev ua siab ntev tos txog hnub uas Nws teb tej lus thov.

– Tus uas muaj kev ntseeg tso siab rau Vajtswv, yeej tsis tu ncua kev zoo siab thiab kev cia siab hauv tus Tswv txojkev cawm dim li.

Xaus lus ces peb pom tias Mikhas cevlus txog 3 lub ntsiab lus tseem ceeb: Qhov uas rau txim rau tebchaws Yixalayees ces yog qhov uas lub tebchaws uas yog tus Mexiyas yuav los cawm kom lawv dim ib hnub tom ntej. Mikhas tes haujlwm tau ceebtoom rau tus Tswv haivneeg tiamsis kuj coj kev cia siab los rau tus Tswv haivneeg. Peb tseem tab tom nyob rau tiam uas puv npo kev txhaum, kev phem kev qias thiab tsis ncaj ncees yeej tsis txawv tiam uas Mikhas nyob ntawd thiab txhua tus puavleej tseem niaj hnub quaj ntsuag, tas kev cia siab. Dhau ntawm tus Tswv Yexus lawm yeej tsis muaj leejtwg yuav coj tau kev thajyeeb, kev ncaj ncees tiag tiag los rau tibneeg li. Yog li ntawd qhov uas coj Tswv Yexus txojkev cawmdim mus rau lwm tus kom lawv muaj kev cia siab thiab cia siab tias ib hnub tom ntej tus Vajntxwv tswjhwm kev thajyeeb yuav los yog ib tes haujlwm ntawm peb txhua tus uas ntseeg huvsi (Tes haujlwm 1:8-11; 2Timautes 4:1-5).

III. LUS NUG XAV THIAB SIV.

1. Tshawb nrhiav txog tiam Mikhas nyob ntawd haivneeg Yixalayees tej kev txhaum zoo li cas (2:1-2; 3:1-12; 6:9-12).
2. Mikhas ceebtoom dabtsi rau tus Tswv haivneeg uas tab tom tsau tsawv hauv txojkev txhaum? (6:9-16).
3. Mikhas cevlus li cas txog tus Mexiyas yuav los? (4:1-3; 5:1-8).
4. a. Mikhas paub txog Vajtswv yog leejtwg? Mikhas muaj kev cia siab rau Vajtswv li cas? (7:7-8,18-20).
5. Nws coj kev nplig siab, kev cia siab li cas los rau Vajtswv haivneeg? (7:14-19).
6. Mikhas tes haujlwm txhawb txhua tus ntseeg niaj hnub nim no txog yam haujlwm twg? (Tes haujwlm 1:8; 2Timautes 4:1-5).
7. a. Koj puas yuav qhia kom lwm tus paub txog tus Tswv thiab ntseeg Nws?
8. Koj puas tseem yog tus tab tom tos hnub uas tus Tswv Yexus rov los?
9. Koj yuav qhia txog yam dabtsi rau tus uas tseem nyob hauv txojkev txhaum?

* HIỂU BIẾT THƯỜNG THỨC.

– Tẩy Các Vết Bẩn Trong Nhà Bếp.

Các vết bẩn trong nhà bếp là sự kết hợp của sức nóng, dầu mỡ, khói và bụi. Nếu không biết cách rất khó tẩy sạch. Xin mách bạn cách sau đây:

+ Lau bằng nước xà phòng gạch men.

+ Nhúng bông hoặc giẻ mềm vào cồn 90 độ chùi các mặt kim loại có sơn của tủ lạnh, tủ đựng thức ăn, lò nấu, lò nướng, lò vi ba.

+ Ngâm vào giấm những dụng cụ nhà bếp khác bị vết cháy khét như dao, vĩ nướng…